Hlaupanúmer með innbyggðri tímatökuflögu
16. ágúst 2019

Allir þátttakendur í Reykjavíkurmaraþoni Íslandsbanka 2019 fá hlaupanúmer sem festa þarf framan á bolinn áður en hlaupið hefst. Öryggisnælur fylgja með til að festa númerið.

Tímataka verður í maraþoni, hálfmaraþoni, 10 km hlaupi og 3 km skemmtiskokki. Tímatökuflagan sem mælir tíma þátttakenda í þessum vegalengdum er innbyggð í hlaupanúmerinu. Hlauparar þurfa því ekki að festa sérstaka tímatökuflögu í skóreimarnar eins og undanfarin ár.

Mjög mikilvægt er að brjóta númerið ekki saman til að skemma ekki tímatökuflöguna. Einnig þarf að passa að festa númerið örugglega framan á bolinn og hafa það vel sýnilegt, sérstaklega þegar farið er yfir tímatökumotturnar. Sjá nánari leiðbeiningar hér.

Tímatökumottur verða staðsettar í markinu og á nokkrum völdum stöðum á hlaupaleiðinni. Tímatakan hefst þegar startskot ríður af og lýkur þegar hlaupari kemur í mark og kallast sá tími byssutími. Einnig er mældur svokallaður flögutími frá því hlaupari fer yfir mottuna í byrjun hlaups til að gefa honum nákvæman persónulegan tíma, óháð því hve aftarlega í hópnum hann var við ræsingu. Byssutíminn er sá tími sem gildir til úrslita í hlaupinu eins og alþjóðlegar reglur um lögleg götuhlaup segja til um. Flögutímann fá allir sem skrá farsímanúmerið sitt við skráningu sendan með sms skilaboðum stuttu eftir að þeir koma í mark. Hægt er að bæta við eða breyta skráðu farsímanúmeri á "mínum síðum".

Hér á rmi.is verða lifandi úrslit á hlaupdag. Um er að ræða óstaðfest úrslit og millitíma sem uppfærð eru á u.þ.b 10 sekúndna fresti (uppfærslutími gæti verið eitthvað lengri á álagstímum). Staðfest úrslit munu liggja fyrir um kl. 17.00 á hlaupdag.

Sérfræðingar frá Tímataka.net og MyLaps í Hollandi sjá um tímatökuna í Reykjavíkurmaraþoni Íslandsbanka.

Tímatökuflagan er límd aftan á hlaupanúmerið

Deila þessari frétt
Samstarfsaðilar

Íþróttabandalag Reykjavíkur (ÍBR) var stofnað 1944 og eru samtök íþróttafélaganna í Reykjavík. Árlega hefur Íþróttabandalagið umsjón með sex stórum íþróttaviðburðum: Reykjavíkurmaraþon Íslandsbanka í ágúst, Laugavegshlaupið í júlí, Tour of Reykjavik og Miðnæturhlaup Suzuki í júní, Norðurljósahlaup Orkusölunnar í febrúar og Reykjavíkurleikar í janúar.