Starfsfólk BBA//Fjeldco ásamt fjölskyldum og vinum hlaupa í Reykjavíkurmaraþoni Íslandsbanka.

Hlaupið tileinkum við minningu okkar elskulega Leós Ásgeirssonar sem lést sviplega langt fyrir aldur fram í byrjun árs. Saman hlaupum við til minningar um dásamlegan og einstakan dreng og söfnum um leið áheitum fyrir Krýsuvíkursamtökin.

Krýsuvíkursamtökin reka meðferðastofnunina Krýsuvík fyrir fólk með alvarlega fíknisjúkdóma. Þar er boðið upp á áfallamiðaða 12 spora meðferð og er markmið samtakanna að gera skjólstæðingum sínum kleift að vaxa og þroskast sem persónur og fá tækifæri til að komast aftur inn í samfélagið sem virkir þjóðfélagsþegnar.

Við hjá BBA//Fjeldco ætlum að leggja okkar lóð á vogarskálarnar og styrkja þessa mikilvægu starfsemi. Með því að heita á hlaupahópinn leggur þú mikilvægu meðferðarstarfi lið og leggur þitt að mörkum til að bæta aðstöðu, gæði og eftirfylgni í fíknimeðferð  og veitir þannig fleirum tækifæri til betra lífs.

Okkur þætti afar vænt um ef þið sæjuð ykkur fært að heita á hópinn sem hleypur í minningu okkar elskulega Leós og styrkja um leið mikilvæga starfsemi Krýsuvíkursamtakanna.

Við fögnum jafnframt öllum hlaupurum sem vilja hlaupa með okkur í minningu elsku Leós. Vinsamlega sendið póst á netfangið vidburdir@bbafjeldco.is og við bætum ykkur við hópinn

Með fyrirfram þökk,

Starfsfólk BBA//Fjeldco, fjölskyldur og vinir