Sigrún greindist fyrst með bólgukrabbamein í brjósti árið 2016, þá 28 ára, þegar hún var með Lexí, 8 mánaða dóttur sína, á brjósti.  Í framhaldi af því fór hún í lyfjameðferð, brjóstnám og geislameðferð og var krabbameinslaus í lok nóvember 2016.

Við tóku 5 ár af andhormónameðferð sem var sett á bið í byrjun 2022 til að gefa Sigrúnu og Högna tækifæri til að eignast annað barn. Þau fengu 1 ár til að verða ólétt og fengu jákvætt próf 31.des, 2022.  Við tók erfið meðganga með mikilli ógleði og bakverkjum. Það sem í byrjun var talið vera brjósklos reyndist vera meinvörp í baki og við frekari skoðun fundust líka meinvörp í lifur. Brjóstakrabbameinið var komið aftur og hafði dreift sér.

Þá tók meðgönguvæn lyfjameðferð við í 12 vikur og síðan kom Úlfur litli í heiminn með keisara þann 1.ágúst síðastliðinn, eftir 35 vikna og 4 daga meðgöngu. Hann var heilsuhraustur og fékk að fara heim 2 dögum eftir fæðingu.

Næst á dagskrá eru fleiri myndgreiningar til að athuga stöðu mála og ný hormóna tengd lyfjameðferð í 8-12 vikur. Síðan tekur við frekari andhormónameðferð og framtíðin hvernig sem hún lítur út.

Fjölskyldan tekur einn dag í einu og reynir að njóta sérhvers þeirra eins og þeir koma.

Við samstarfsfólk hennar í NetApp (og fjölskyldur þeirra) ætlum að hlaupa í maraþoninu í ár til styrktar Krafti, til stuðnings fjölskyldunnar.