Ég hleyp fyrir Dropann ♡ fyrir Birtu Katrínu og öll þau sem lifa með sykursýki 1

Í ár ætla ég að taka þátt í Reykjavíkurmaraþoninu til styrktar Dropanum sem er styrktarfélag barna með sykursýki. Það er málefni sem mér er afar kært, því litla barnabarnið mitt hún Birta Katrín, greindist með sykursýki 1 fyrir ári síðan.

Þetta hefur verið mjög krefjandi ár fyrir okkur öll, foreldra hennar, bróður og auðvitað Birtu Katrínu sjálfa. En hún hefur staðið sig eins og hetja frá fyrsta degi og sýnir ótrúlegt æðruleysi og styrk sem við dáumst að.

Þó við stöndum öll þétt saman, þá getur þetta líf stundum verið einmanalegt og yfirþyrmandi, þess vegna skiptir félag eins og Dropinn svo miklu máli. Þau veita stuðning sem hjálpar fólki að finna að það er ekki alveg eitt í þessu.

Með því að taka þátt þá ætla ég að leggja mitt af mörkum og vonast til að safna smá styrk fyrir starf þeirra, Dropinn skipuleggur sumarferðir á hverju ári fyrir börn og unglinga með sykursýki sem og samkomur þar sem fjölskyldur barna með sykursýki hittast.

Ef þú vilt styrkja mig og þar með styðja við mikilvægt málefni, þá er ég þakklát fyrir hverja krónu því hver einasta króna skiptir máli.

Takk fyrir stuðninginn ♡