Hafandi glímt við hamlandi kvíða í um áratug sem hafði mikil áhrif á líf mitt hefur allt sem við kemur andlegri heilsu skipt mig miklu máli. Á alþjóðlegum degi sjálfsvígsforvarna árið 2025 safnaði ég 70.000 kr. fyrir Píeta með sölu á bókinni minni "Ég er ekki fullkominn" þar sem ég geri upp þetta tímabil í mínu lífi á einlægan hátt frá botninum og á toppinn. Nú langar mig að gera gott betur og stefni á að safna 100.000 kr. fyrir Píeta samtökin með því að safna áheitum í Reykjavíkurmaraþoninu þar sem ég ætla að hlaupa 10km. Ég þekki það af eigin raun hvað andlegu flækjurnar geta verið miklar og hreinlega litið út fyrir að vera óyfirstíganlegar. En með góðri hjálp er allt hægt og þess vegna skipta Píeta samtökin einmitt svo miklu máli en þau veita meðferð fyrir þá sem eru í sjálfsvígshættu eða sjálfskaða, viðtöl og stuðning við aðstandendur þeirra og aðstandendur sem hafa misst. Þjónustan er fyrir 18 ára og eldri og er gjaldfrjáls.