Þann 11. mars síðastliðinn fengum við verstu fréttir sem foreldrar geta nokkurn tímann fengið… Barnið þitt er með krabbamein. Allt breyttist, lífið fór ekki bara í hring heldur í þeytivindu. Maður upplifir tilfinningar á nýjan hátt og skyndilega fara tilfinningar eins og hræðsla, ótti og varnarleysi að ráða deginum hjá manni. En líka vilji, vilji til að berjast og gera allt sem hægt er til að vinna þennan fjanda sem krabbameinið er. Strákurinn minn, hetjan mín, heitir Dagur Logi og hann fékk þetta ömurlega verkefni í hendurnar sem ekkert barn á að þurfa að ganga í gegnum. En hann er ótrúlegur, fullur af æðruleysi og yfirvegun hefur hann tekist á við þetta hlutverk af þvílíku jafnaðargeði að ég get eiginlega ekki lýst því. Hann er bestur. Og nú er hann kominn í mark, meinið er farið og nú hefst endurhæfingin. Það mun taka tíma og þrek hjá mínum manni, en hann mun tækla það af sömu stórkostlegu jákvæðni og hann hefur gert í öllu þessu ferli.

Að upplifa svona ferli er erfitt, ósanngjarnt og krefst gífurlegrar orku. Og þá er gott að hafa öflugt stuðningsnet. Þess vegna ætla ég að hlaupa 10 km í Reykjavíkurmaraþoninu og ég ætla að hlaupa fyrir Börn með krabbamein. 

Börn með krabbamein - styrktarfélag eru mögnuð samtök. Markmið þeirra er að styðja við börn og aðstandendur þeirra á meðan krabbameinsmeðferð stendur sem og eftir meðferð líkur. Það er ekki síður mikilvægt. Starfsemi félagsins er ómetanlegur stuðningur fyrir fjölskyldur barna með krabbamein og ég vil gera mitt til að tryggja að félagið geti haldið áfram að veita fjölskyldum barna sem greinast með þennan sjúkdóm sem bestan stuðning í framtíðinni.