Ég hleyp sem meðlimur í Hlaupahópi Hoffu Skarp (tengdamömmu) fyrir Ljósið.

Hér fylgir lýsing á hlaupahópnum sem tekur ágætlega saman tilgang og markmið hópsins.

***

Hlaupahópur Hoffu Skarp samanstendur af afleggjurum og öðrum aðstandendum Hoffu Skarp.

Seinni hluta árs 2023 greindist Hoffa með fjórða stigs krabbamein og hefur frá því tímamarki þurft að reyna ýmislegt, þ.m.t. yfir þrjátíu lyfjameðferðir og hin ýmsu inngrip og aðgerðir. Hoffa hefur nálgast öll sín verkefni af sínum alkunna krafti og dugnaði og meiri baráttukona verður seint fundin.

Þennan tíma hefur Hoffa einnig nýtt til að lifa lífinu lifandi og til fulls. Hún hefur ferðast eins mikið og mögulegt hefur verið, spilað golf, mætt í öll partýin, sinnt barnarbörnunum betur en nokkru sinni fyrr og flutt búferlum svo fátt eitt sé nefnt, hún hefur hvergi slegið af og það hefur verið gaman og gefandi að vera með henni í þessu öllu. Hún hefur kosið að takast á við sitt verkefni með kærleika og hlýju að vopni.

Eftir að Hoffa greindist fór hún að sækja þjónustu í Ljósinu. Í Ljósinu hefur hún stundað yoga, farið í djúpslökun, kynnst góðu fólki og lært og lagt stund á keramík. Hún hefur tekið slíkum framförum í keramíkinu að sumir eru farnir að tala um leirlistakonuna Hoffu Skarp.

Á sínum yngri árum var Hoffa mikill hlaupari, hefur hlaupið ýmis maraþon hérlendis og erlendis, var lengi vel í hlaupahóp ÍR og var meðal fyrstu kvenna til að hlaupa Laugaveginn. Er því vel við hæfi að stofna hlaupahóp í hennar nafni og nýta Reykjavíkurmaraþonið til að safna nokkrum krónum til að kaupa aðeins meiri leir og  styðja það ómetanlega og góða starf sem fer fram á vegum Ljóssins.

Lifi ljósið, áfram gakk!