Matthildarsamtökin eru íslensk félagasamtök sem vinna að skaðaminnkun, mannréttindum og stuðningi fyrir fólk sem notar vímuefni. Samtökin voru stofnuð árið 2022 og leggja áherslu á að nálgast vímuefnavanda út frá lýðheilsu, vísindum og mannréttindum fremur en refsingu. Markmið Matthildarsamtakanna er að öll sem nota vímuefni hafi aðgang að gagnreyndri skaðaminnkandi þjónustu og stuðningi, til að tryggja öryggi sitt og heilbrigði.

Samtökin reka tvær skaðaminnkandi þjónustur, Matthildarteymið og Reykur. Reykur er skaðaminnkandi þjónusta, ráðgjöf og eftirfylgni fyrir fólk sem glímir við vímuefnavanda og reykir ópíóíða og örvandi vímuefni, á öllu landinu. Þjónustan er veitt að kostnaðarlausu og geta einstaklingar leitað til hennar í nafnleynd. Matthildarteymið veitir lágþröskulda skaðaminnkandi þjónustu og sálrænan stuðning í skemmtana- og tónlistarlífinu á Íslandi.