Hugrún, geðfræðslufélag var stofnað vorið 2016 af nemendum í hjúkrunarfræði, læknisfræði og sálfræði við Háskóla Íslands. Í dag taka fjölmargir nemendur úr Háskólanum í Reykjavík og Háskólanum á Akureyri einnig þátt í starfsemi félagsins. Félagið hefur það að markmiði að fræða ungt fólk um geðheilbrigði, geðraskanir og úrræði, sem og að auka samfélagslega vitund.

Stærsta verkefni Hugrúnar ár hvert er að ferðast um landið og halda geðfræðslufyrirlestra í framhaldsskólum, endurgjaldslaust.

Auk þess hefur félagið staðið fyrir árlegum fræðslukvöldum í Háskóla Íslands, greinaskriftaátaki í tilefni alþjóðlega geðheilbrigðisdagsins, fræðslu og kynningum í félagsmiðstöðvum og fyrir foreldra- og nemendafélög. Árið 2018 gaf Hugrún út veftímarit samhliða herferðinni Huguð sem ætlað er að stuðla að opinni umræðu um geðraskanir og er aðgengilegt í gegnum heimasíðuna. Þá reynir Hugrún að ná til ungmenna með ýmsum hætti og heldur úti instagram síðunni @gedfraedsla þar sem félagið birtir góð ráð fyrir bætta geðheilsu. Hugrún er einnig með vefsíðuna gedfraedsla.is þar sem hægt er að finna upplýsingar um geðheilsu, geðraskanir og tiltæk úrræði hérlendis. Vefsíðan var opnuð haustið 2016 og er í stöðugri uppfærslu. Markmið hennar er að gera fræðsluefni um geðheilbrigði og geðraskanir aðgengilegt, á mannamáli. Þar eru einnig ráð um hvernig foreldrar geta nálgast umræðu um geðheilsu við börnin sín. Árið 2022 var vefsíðan yfirfært á hljóðrænt form með hlaðvarpinu Hugvarpið, í samstarfi við þáttastjórnendur þess. Í því taka þáttastjórnendur viðtöl við fagaðila um ýmislegt tengt geðheilsu.

Á hverju ári býðst háskólanemendum tækifæri á að starfa sem fræðarar fyrir hönd Hugrúnar. Þeir þurfa að uppfylla ákveðin skilyrði og ljúka þjálfun áður en þeir mega halda geðfræðslufyrirlestra. Fræðarar Hugrúnar eru í sjálfboðavinnu og ferðast um land allt í framhaldsskóla til að fræða ungmenni um geðheilbrigði, geðraskanir og úrræði sem standa til boða.

Starfsemi félagsins er haldið uppi af áhugasömum háskólanemendum sem brenna fyrir því að bæta vitneskju um geðheilbrigði, útrýma fordómum og styrkja ungmenni. Félagið er rekið á styrkjum, frjálsum framlögum og fjáröflunum, allur ágóði rennur í fræðslu ungmenna um geðheilbrigði.