Hópur stofnaður af fjölskyldu Sigurbergs Sigsteinssonar, fyrrum íþróttakennara, þjálfara og landliðsmanni í handbolta og fótbolta. Í minningu Sigurbergs okkar reimum við á okkur hlaupaskóna, hlaupum í Reykjavíkurmaraþoninu og söfnum áheitum fyrir Alzheimersamtökin en Sigurbergur glímdi við Alzheimersjúkdóminn síðustu árin sín.

Þörf er á frekari rannsóknum á orsökum heilabilunar en við viljum halda á lofti sögunni hans elsku Sigurbergs og umræðunni um tengsl á milli höfuðáverka í snertiíþróttum og heilabilunar. Hvort sem um er að ræða heilahristing eða mörg væg höfuðhögg. Sigurbergur okkar tók all nokkra skallaboltana og bar nafn með rentu þegar kallaður Gullskallinn. Hvort sem það var orsökin hjá elsku Sigurbergi er ekki vitað með vissu en nýlegar rannsóknir hafa rennt stoðum undir þessi tengsl (1, 2). Sem betur fer er meira um það í dag að markmenn kasti frekar út bolta eða sparki stutt til næsta leikmanns en við viljum undirstrika mikilvægi þess að halda þessari umræðu opinni, um tengsl höfuðáverka í snertiíþróttum og heilabilunar.

Allir velkomnir í hópinn sem vilja taka þátt og hlaupa í minningu Sigurbergs og/eða safna áheitum fyrir Alzheimersamtökin og þeirra mikilvæga starf 💜

1. Ueda P, Pasternak B, Lim CE, et al. Neurodegenerative disease among male elite football (soccer) players in Sweden: a cohort study. Lancet Public Health 2023;8:e256-e65.

2. Mackay DF, Russell ER, Stewart K, MacLean JA, Pell JP, Stewart W. Neurodegenerative Disease Mortality among Former Professional Soccer Players. N Engl J Med 2019;381:1801-8.