Tilvera eru hagsmuna- og stuðningssamtök fyrir fólk sem glímir við ófrjósemi. Talið er að einn af hverjum sex einstaklingum upplifi ófrjósemi á einhverjum tímapunkti í lífinu og því snertir málefnið fleiri en margir gera sér grein fyrir.

Ófrjósemi getur haft djúpstæð áhrif á líf fólks — andlega, líkamlega og félagslega — auk þess sem hún getur valdið miklu fjárhagslegu álagi. Ferlið getur verið langt og krefjandi og reynir oft á sambönd, sjálfsmynd og daglegt líf þeirra sem ganga í gegnum það.

Markmið Tilveru er að vera sterkur málsvari þeirra sem upplifa ófrjósemi, gæta hagsmuna þeirra og stuðla að aukinni fræðslu og opnari umræðu í samfélaginu. Samtökin leggja áherslu á að enginn þurfi að ganga í gegnum þetta einn.

Tilvera heldur reglulega stuðningsfundi meðal jafningja þar sem fólk getur hist, deilt reynslu sinni og fundið skilning hjá öðrum sem þekkja aðstæðurnar af eigin raun. Einnig býður félagið upp á ókeypis símaráðgjöf hjá sálfræðingi og leitast við að styðja félagsfólk sitt á eins margvíslegan hátt og mögulegt er.

Á heimasíðu Tilveru má finna fjölbreyttar upplýsingar um ófrjósemi, meðferðir og úrræði ásamt fræðsluefni og reynslusögum. Samtökin halda einnig úti virkum stuðnings- og spjallhópum á Facebook þar sem fólk getur leitað stuðnings, fengið ráð og fundið samfélag sem skilur hvað það er að ganga í gegnum.

Með þátttöku í Reykjavíkurmaraþoninu viljum við vekja athygli á mikilvægu starfi Tilveru og styðja við fólk sem tekst á við ófrjósemi á hverjum degi.