Bergið Headspace opnaði haustið 2019 og veitir ungmennum á aldrinum 12–25 ára gjaldfrjálsa ráðgjöf og stuðning. Ungmenni geta haft samband og fengið viðtal við ráðgjafa fljótt, annað hvort á staðnum eða í gegnum fjarþjónustu.

Í Berginu starfar fagfólk með reynslu af því að vinna með ungu fólki. Markmiðið er að bjóða upp á hlýlegt og öruggt umhverfi þar sem ungmenni geta rætt líðan sína og fengið stuðning áður en vandinn verður stærri.

Mörg ungmenni leita sér ekki hjálpar fyrr en líðan þeirra er orðin slæm. Bergið leggur því áherslu á að vera aðgengilegt úrræði þar sem hægt er að leita sér stuðnings snemma og án flókinna skilyrða.

Á hverjum tíma sækja um 400–500 ungmenni þjónustu Bergsins og um 120 ungmenni koma í viðtöl í hverri viku.

Rekstur Bergsins byggir að hluta á stuðningi almennings og fyrirtækja. Stuðningur hlaupara í Reykjavíkurmaraþoninu skiptir þar sköpum fyrir starfsemi Bergsins og gerir okkur kleift að halda áfram að veita ungmennum um allt land gjaldfrjálsan stuðning. Allir sem hlaupa fyrir Bergið fá hlaupabol frá Berginu og við leggjum áherslu á að skapa góða stemningu í kringum hlauparana okkar.