Empower Nepali Girls eru samtök sem hafa það markmið að efla og styðja ungar stúlkur í Nepal og er lögð áhersla á að styðja við stúlkur úr lægstu stigum þjóðfélagsins, sem eru í mestri hættu á að vera neyddar barnungar til giftingar, seldar í kynlífsþrælkun eða yfirgefnar á annan hátt. Nepal er eitt af fátækustu ríkjum heims og er talið að ár hvert séu yfir 10.000 nepalskar stúlkur seldar í kynlífsþrælkun. Samtökin veita skólastyrki og annan stuðning til stúlkna sem annars myndu ekki fá tækifæri til að mennta sig og gera þeim þannig ljóst að þær geta og mega læra það sem þær vilja og þurfa ekki að giftast og eignast börn þegar þær eru sjálfar barnungar.