Hjálpartækjasjóður Sindra var stofnaður fyrir Sindra Pálsson sem er 15 ára og fæddist með heilkennið Warburg Micro Syndrome. Heilkennið veldur sjónskerðingu, einhverfu og lágri vöðvaspennu. Þrátt fyrir sínar takmarkanir þá gat Sindri lifað góðu og innihaldsríku lífi, stundaði nám í Klettaskóla og rúllaði sér út um allar trissur á hjólastólnum sínum.

Í lok september 2023 varð Sindri fyrir miklu áfalli þar sem hann varð fyrir mænuskaða og lamaðist fyrir neðan axlir vegna aðgerðar á Landspítalanum.  Sindri veiktist alvarlega í kjölfar þessa áfalls og var í 2 mánuði á gjörgæsludeild.  Hans bíður nú löng og ströng endurhæfing en ljóst er að lömunin er varanleg. Sindra bíður nýr veruleiki og mikil lífsgæðaskerðing. Hann sem áður var heilsuhraustur er nú háður lyfjum og tækjum og þarfnast aðstoðar og umönnunar allan sólarhringinn.

Við, Vinir Sindra, viljum safna áheitum í Reykjavíkurmaraþoninu til að styrkja Sindra á þessum erfiðu tímum. Upphæðin sem safnast rennur öll í Hjálpartækjasjóð Sindra og verður nýtt til að styrkja Sindra í öllu því sem eykur lífsgæði hans og hamingju í lífinu.