Góðgerðarfélag Grænuhlíðar var stofnað til að tryggja að börn, unglingar og fjölskyldur sem þurfa á stuðningi að halda geti fengið aðstoð – óháð fjárhag. Með þínum stuðningi getum við veitt þeim sem standa höllum fæti aðgang að fjölbreyttri, sérhæfðri og umvefjandi meðferð sem getur skipt sköpum í lífi þeirra.

Grænahlíð er sérhæft fjölskyldumiðað geðheilbrigðisúrræði fyrir börn og ungmenni á aldrinum 0 til 25 ára og fjölskyldur þeirra. Í Grænuhlíð starfar þverfaglegt teymi meðferðaraðila sem leitast við að veita fjölskyldum í heild og einstaklingum innan hennar sérhæfða og heildræna meðferð óháð aldri. Fagfólk Grænuhlíðar veitir margvíslega meðferð og inngrip byggð á nýjustu þekkingu og rannsóknum varðandi áfallamiðaða nálgun og tengslaeflandi meðferð. Sérstaða Grænuhlíðar er sú að ekki er aðeins litið á barnið/ungmennið sem einstakling, heldur sem hluta af stærri fjölskyldueiningu og þess vegna teljum við mikilvægt að meðferðaraðilar barna og fullorðinna starfi saman undir sama þaki.