Almannaheillafélagið Vonarbrú var stofnað vorið 2025 í framhaldi af óformlegu hjálparstarfi Kristínar S. Bjarnadóttur hjúkrunarfæðings, sem hafði þá verið í sambandi við fjölmargar stríðshrjáðar barnafjölskyldur á Gaza í tæpt ár.

Tilgangur Vonarbrúar

Tilgangur Vonarbrúar er að senda styrki beint til um 70 barnafjölskyldna sem lifa við þjóðarmorð á Gaza, þar sem alþjóðlegum hjálparstofnunum er að mestu leyti meinaður aðgangur. Styrkirnir eru nýttir til að kaupa mat, ungbarnavörur, svo sem þurrmjólk og bleiur, hreinlætisvörur, lyf, heilbrigðisþjónustu, fatnað og tjöld. Svo og til greiðslu húsaleigu. Sjálfboðaliðar Vonarbrúar veita einnig sálfélagslegan stuðning og rjúfa einangrun fólksins við umheiminn. 

Hvernig komast styrkirnir til fjölskyldnanna?

Styrkir eru sendir beint til fjölskyldnanna á staðfesta söfnunarreikninga, bankareikninga eða í rafræn veski. Gengið hefur vel að koma styrkjum til fjölskyldnanna og hefur fólk fengið styrki sem annars hefði haft litla sem enga aðstoð. Styrkir frá Vonarbrú hafa þannig skipt sköpum fyrir þessar fjölskyldur, oft á ögurstundu. 

Sjálfboðaliðar Vonarbrúar eru í beinu sambandi við fjölskyldurnar í gegnum skilaboðahólf samfélagsmiðla, meðal annars með myndsímtölum. Stuðningur byggist á því að fyrst sé staðsetning fólksins á Gaza staðfest með myndsímtölum og GPS tækni.