Styrktarsjóðurinn Eldtaugar var stofnaður til að styðja við baráttu ljósmyndarans Geirax (Ásgeirs Ásgeirssonar), sem greindist með hinn alvarlega og lítt þekkta taugasjúkdóm CRPS (Complex Regional Pain Syndrome). Hjá Geira hefur sjúkdómurinn dreift sér um allan líkamann (full-body CRPS) og veldur stanslausum, lamandi vítiskvölum hvern einasta dag.

Á meðan Geiri barðist árum saman fyrir réttri greiningu starfaði hann sjálfstætt sem fréttaljósmyndari á vegum PressPhotos og Reuters. Hann myndaði marga af stærstu fréttaviðburðum þjóðarinnar á árunum 2010-2019, en þá neyddist hann til að leggja myndavélina á hilluna, þar sem ástand hans hafði jafnt og þétt versnað á meðan hann var sendur fram og til baka milli sérfræðinga, greindur með allt frá tennis olnboga upp í brjósklos, en engar meðferðartilraunir báru árangur, né hægðu þær á þróuninni.

Geiri er mikill listaunnandi og myndaði störf sjálfstæðu leikhópanna í Tjarnarbíói, að mestu í sjálfboðavinnu, og hélt nokkrar ljósmyndasýningar. Einkasýningar hans hafa farið fram í Tjarnarbíói og Gallerí Fold; þá var hann einnig með einkasýningu á göngugötunni á Skólavörðustíg og eins með samsýningu með félögum sínum í PressPhotos í Tjarnarsal Ráðhúss Reykjavíkur, hvor tveggja í samstarfi við Hinsegin daga og Reykjavíkurborg.

Auk þess að standa fyrir mikilvægri vitundarvakningu um CRPS hér á landi, er meginhlutverk sjóðsins að veita Geira beinan fjárhagslegan stuðning. Sjúkdómurinn hefur gert hann algjörlega óvinnufæran og að miklu leiti rúmfastann, en  vonir standa nú til þess að hægt sé að koma honum í sérhæfða meðferð og endurhæfingu erlendis sem gæti veitt honum mikla bót. Sjúkratryggingar Íslands greiða hins vegar ekki niður slík sérhæfð úrræði og treystir sjóðurinn og fjölskyldan því algjörlega á áheit og stuðning velunnara til að láta þessa ferð verða að veruleika.

CRPS er flókið verkjaheilkenni þar sem ofvirk taugaboð senda stanslaus sársaukaskilaboð til heilans. Sársaukanum er lýst ýmist sem brennandi eldi, stingandi kulda, stingandi nálum , doða og alvarlegum krömpum, og skorar sjúkdómurinn hæst allra á alþjóðlegum sársaukakvörðum.

Með því að hlaupa og safna áheitum fyrir Eldtaugar í Reykjavíkurmaraþoninu hjálpar þú Geira beint að eygja von um bót og styður við erfiða baráttu hans fyrir bættum lífsgæðum og mannsæmandi lífi.

Sjá má sjónvarpsviðtal sem Sigrún Ósk Kristjánsdóttir tók við Ásgeir fyrir Ísland í dag árið 2020 hér: https://www.visir.is/g/20202022140d