Í ár eru 10 ár liðin frá því að sonur, bróðir og vinur okkar, Vignir Már Björnsson, féll fyrir eigin hendi.

10 ár er langur tími af söknuði, en á þessum tímamótum langar okkur að gera eitthvað sem getur skipt máli fyrir aðra – í hans nafni.

Þess vegna ætlum við að hlaupa í Reykjavíkurmaraþoninu og safna fyrir Píeta samtökin. Með hlaupinu viljum við heiðra minningu Vignis og leggja okkar af mörkum til að styðja við þau sem glíma við sjálfsvígshugsanir, syrgjendur og aðstandendur. Píeta samtökin vinna ómetanlegt starf með því að veita stuðning, hlustun og von þegar mest á reynir.

Ef þú hefur tök á, hvetjum við þig til að styrkja söfnunina. Hvert framlag, stórt sem smátt, hjálpar Píeta að halda áfram mikilvægu starfi sínu og getur skipt sköpum fyrir einhvern sem þarf á hjálp að halda.

Við þökkum af öllu hjarta fyrir stuðninginn og fyrir að hjálpa okkur að halda minningu Vignis á lofti með því að láta gott af sér leiða.