Ég vil leggja mitt af mörkum og styrkja Kraft og þeirra óeigingjarna starf. Ég er í grunnin til heilsuhraust og hef verið virk í hreyfingu frá unga aldri. Tók þátt í RVK maraþoninu fyrir 13 árum og verið draumur að hlaupa aftur. Tilvalið að gera það nú þegar nýr kafli í lífi mín hefur farið í gang og sýna hvað í mér býr! 

Brjóstakrabbamein smá saga...

Greindist með krabbamein í des, rétt fyrir jólin. Síðan voru haldin gleðileg jól, en flest ykkar geta gert ykkur í hugarlund að þau voru ansi skrítin. Í kjölfarið fór ég í rannsóknir, ástungu, segulómun, aðgerð (brjóstnám og holhandarhreinsun). Erfitt ferli og mikill tilfinningarússíbani. Gífurlega þakklát starfsfólki Brjóstamiðstöðvar fyrir ekki bara yndislegt starfsfólk, heldur lífsbjörgina. Ég er líka þakklát lækninum á heilsugæslunni sem tók þetta grafalvarlega og setti mig í flýtimeðferð.

Ég er krabbameinslaus, nú er í gangi meðferð sem minnkar líkur á að meinið greinist aftur. Lyfjameðferðin olli hármissi og misskemmtilegum aukaverkunum .Oki þær eru auðvitað ömurlegar! Það finnst engin lífsstílstengd, genatengd eða umhverfistengd skýring á krabbameininu mínu. Eina sem mér var sagt er að ég er kona og þetta hafi verið hormónadrifið.

Þakklát Ljósinu fyrir þeirra yndislega starfsfólk, Krabbameinsfélaginu og Krafti. Núna einnig starfsfólki 11B, þar eru sko englar að verki ♡. Gera þetta allt léttbærara. Ótrúlega öflugt starf í gangi og er hugur minn hjá öllu því hugrakka fólki sem þarf að ganga í gegnum krabbameinsmeðferðir . Hetjur!

Mig langar að minna allar konur að ÞREIFA á þann þriðja hvers mánaðar og setja það í rútínu að  "þreifa þann þriðja" eins og Bracca samtökin minntu á.