Einar Kristján, okkar hjartans pabbi, frændi og vinur, hefði orðið sjötugur 12. nóvember nk. hefði hann lifað. Af því tilefni ætlum við fólkið hans að hlaupa í hans minningu í Reykjavíkurmaraþoninu.

Einar skildi eftir sig spor hjá öllum sem kynntumst honum. Hann var framúrskarandi gítarleikari og kennari, tónlistarmaður af lífi og sál en umfram allt yndislegur vinur og fjölskyldumaður. Hann hafði einstakan húmor, mikla hlýju og þann hæfileika að láta öllum líða vel í návist sinni.

Við hlaupum til að minnast Einars Kristjáns sem kvaddi alltof snemma en lifir áfram í tónlistinni, sögum, vísum, minningum og í fólkinu sem þekkti hann. Við hvetjum alla sem þekktu Einar, lærðu hjá honum, spiluðu með honum eða vilja heiðra minningu hans að slást í hópinn með okkur.

Ágóðinn af söfnuninni rennur í minningarsjóð Kristjáns Eldjárns gítarleikara en þeir félagar létust með skömmu millibili árið 2002. Minningarsjóðurinn verðlaunar árlega efnilega tónlistarmenn og afreksfólk í tónlist og málefnið því sannarlega í anda Einars Kristjáns.