Hlauparar
Samtals Safnað
Markmið
Ákjósanleg greiðsluleið
Ég hleyp fyrir 1 af hverjum 10!
Í ár ætla ég að láta hvert skref telja og hlaupa 10 km í Reykjavíkurmaraþoninu með hjartanu - fyrir Endósamtökin.
Ég sit í stjórn Endósamtakanna og þekki af eigin raun hvað sjúkdómurinn hefur mikil áhrif á lífsgæði og framtíðarhorfur fólks. Það er því nöturleg staðreynd að greiningartími sjúkdómsins á Íslandi mælist enn í mörgum árum.
Endósamtökin fagna 20 ára afmæli í október 2026. Við höfum náð ótrúlegum árangri á þessum 20 árum, en vegna vanþekkingar og skorts á skilningi á sjúkdómnum eigum við ennþá langt í land. Helsta afrek samtakanna er að hafa skapað þetta fallega samfélag utan um fólk sem hefur lengi upplifað sig vanmáttugt gagnvart kerfinu og sjálfu sér. Saman höfum við fundið styrkinn til að berjast fyrir sjálfum okkur og öðrum – fyrir bættri þjónustu og betri lífsgæðum.
Með því að heita á mig styður þú við ómetanlegt starf Endósamtakanna í þágu aukinnar fræðslu ungmenna og hagsmunabaráttu þeirra sem glíma við sjúkdóminn.
Saman gerum við ósýnilegan sjúkdóm sýnilegan. Takk fyrir stuðninginn!
Endósamtökin
Um 10% fólks sem fæðist með leg er með endómetríósu eða um 176 milljónir í heiminum. Endómetríósa er ekki bara slæmir túrverkir. Sjúkdómnum geta fylgt miklar kvalir og ýmsir erfiðir fylgikvillar, þar á meðal meltingarvandræði og ófrjósemi. Meðalgreiningartími er 7-8 ár. Stuðningur og fræðsla er meginverkefni Endósamtakanna. Samtökin vinna ötullega að því að fræða almenning og heilbrigðisstarfsfólk um sjúkdóminn. Margt fólk með endómetríósu finnur fyrir vantrú annarra og þarf enn þann dag í dag að berjast fyrir viðurkenningu á líðan sinni og einkennum.
Nýir styrkir
