Ég ætla að hlaupa heilt maraþon í Reykjavíkurmaraþoninu 22. ágúst nk. Ég hleyp í minningu um elsku mömmu, Gunnhildi Óskarsdóttur, sem hefði orðið 67 ára í  ár og er að safna áheitum fyrir styrktarfélagið Göngum saman sem styður við grunnrannsóknir á brjóstakrabbameini.

Mamma greindist með brjóstakrabbamein árið 1998, þá aðeins 38 ára gömul, og lést í mars 2023 eftir að hafa lifað á aðdáunarverðan hátt með sjúkdómnum í fjölmörg ár.

Með smitandi jákvæðni og trú á að lækning fyndist stofnaði mamma Göngum saman árið 2007 ásamt vinkonum sínum. Hún vildi leggja sitt af mörkum í baráttunni gegn brjóstakrabbameini og með stofnun Göngum saman gaf hún jafnframt öðrum tækifæri til að taka þátt í þeirri vegferð. Frá stofnun hefur Göngum saman styrkt íslenskar rannsóknir um 180 milljónir króna og hefur félagið starfað af miklum krafti og stuðlað að aukinni vitund, stuðningi og fjármögnun mikilvægra rannsókna á brjóstakrabbameini á Íslandi.

Eftir að mamma lést byrjaði ég að hlaupa með það að markmiði að hlaupa 10K í Reykjavíkurmaraþoni 2023 til styrktar Göngum saman. Mér hafði aldrei fundist gaman að hlaupa en hlaupin hjálpuðu mér við að dreifa huganum og halda rútínu í sorginni. Ég hef ekki hætt að hlaupa síðan og hef í millitíðinni tekið þátt í þremur hálfmaraþonum, í Washington og London.

Ég er bæði spennt og stressuð fyrir þessari áskorun enda hélt ég því fram lengi fram að ég myndi aldrei hlaupa maraþon. Ég verð 40 ára daginn eftir hlaupið og það verður gaman að reyna að tikka í þetta box á meðan ég er ennþá þrjátíuogeitthvað og enn betra að geta látið gott af mér leiða um leið.

Ég sakna mömmu alla daga en hún lifir áfram í öllum góðu minningunum og fólkinu sínu, ekki síst öllu frábæra fólkinu sem kemur að Göngum saman.

Gangan í átt að lækningu heldur áfram og þætti mér óskaplega vænt um áheit frá ykkur, kæru vinir.

Koma svo, brjóstanna vegna.