Hæ! Ég heiti Gummi.

Þann 22. ágúst ætla ég að hlaupa hálfmaraþon í Reykjavíkurmaraþoninu. Ég mun hlaupa alla leiðina klæddur í engu nema bleiku handklæði.

Af hverju í ósköpunum er ég að þessu?

Ég er að safna áheitum fyrir Einhverfusamtökin.

Kerfið okkar er ekki að ná utan um öll börn. Alltof mörg ungmenni með taugaþroskafrávik, eins og einhverfu og ADHD, detta á milli kerfa og fá ekki þann stuðning sem þau þurfa. Umfjöllun Kveiks á RÚV sýndi þetta skýrt: biðlistar eru of langir, úrræði af skornum skammti og of mörg börn og fjölskyldur sitja eftir hjálparlaus.

Tölurnar eru sláandi. Rannsóknir benda til þess að fólk á einhverfurófi sé 3–9 sinnum líklegra til að falla fyrir eigin hendi en aðrir. Yfir 70% einhverfra barna verða fyrir alvarlegu einelti í skólakerfi sem er oft illa í stakk búið til að mæta þörfum þeirra. Afleiðingarnar geta verið einangrun, kvíði, þunglyndi og önnur alvarleg geðræn vandamál.

Ég þekki sjálfur hvernig það er að upplifa að maður passi hvergi inn. Þess vegna get ég ekki horft aðgerðalaus á meðan þessi staða heldur áfram.

Ég ætla að leggja á mig hálfmaraþon á malbikinu. Ef þú hefur tök á því vona ég að þú viljir leggja þessu málefni lið með áheiti til styrktar Einhverfusamtökunum. Framlagið þitt styður mikilvæga hagsmunabaráttu, fræðslu og stuðning við fólk á einhverfurófi og aðstandendur þeirra.

Takk kærlega fyrir stuðninginn.

Sjáumst á ráslínunni – í handklæðinu.

– Gummi (@gummigiga)