Ég ætla að taka þátt í 3 km skemmtiskokkinu í Reykjavíkurmaraþoninu í ár og safna áheitum fyrir málefni sem stendur mér einstaklega nærri eða Dýrahjálp Íslands. ❤️🐾

3 km hljómar kannski ekki löng vegalengd í samhengi við maraþon, en fyrir mig hafa þessir 3 km töluvert meiri þýðingu en talan gefur til kynna. Fyrir nokkrum árum hefði ég ekki trúað því að ég ætti eftir að geta gengið þessa vegalengd, hvað þá hlaupið eða skokkað hana. Að geta staðið á ráslínunni í ár er því persónulegur áfangi sem mig langar að nota til góðs.

Það var auðvelt að ákveða hvaða málefni ég vildi hlaupa fyrir. Dýrahjálp Íslands og dýrin sem við aðstoðum eru stór hluti af mínu lífi og málefni sem brennur á mér.

Í starfi mínu hjá Dýrahjálp sé ég á hverjum degi hversu mikilvægt það er að samtök eins og Dýrahjálp séu til. Til okkar koma dýr sem þurfa á hjálp að halda af alls konar ástæðum og stundum eru við þeirra eina úrræði. Ég sé líka hversu mikið þarf til að halda starfseminni gangandi. Á bak við hvert dýr sem við getum hjálpað er dýralækniskostnaður, fóður, lyf, aðföng, endurhæfing og ótal margt annað. Við viljum geta aðstoðað öll þau dýr sem þurfa á okkur að halda en til þess þurfum við stuðning.

Þess vegna ætla ég að láta þessa 3 km telja. 🐾

Ef þú vilt hvetja mig áfram þætti mér ótrúlega vænt um áheit, hvort sem það er stórt eða smátt. Hver króna skiptir máli og fer í að hjálpa dýrum sem þurfa svo sannarlega á okkur að halda.

Ég skal svo gera mitt besta til að koma mér alla 3 kílómetrana yfir marklínuna. 😅❤️