Ég hleyp fyrir minn kæra vinnustað Krabbameinsfélagið því ég veit það best sjálf að starfsemin sem þar fer fram kemur okkur öllum við.

Krabbameinsfélagið styður við svo marga vinkla sem snúa að krabbameinum. Sjálf vinn ég í stuðnings og ráðgjafarteymi félagsins sem býður upp á gjaldfrjáls viðtöl, námskeið og fleira fyrir þá sem hafa greinst með krabbamein, aðstandendur og þá sem hafa misst ástvin vegna krabbameins

síðasta árið hef ég unnið að því að efla mína heilsu og það má segja að rétt eins og Forrest nokkur Gump hafi ég einn góðan veðurdag tekið upp á því að byrja að skokka á miðri göngu minni án þess að hafa haft nokkrar fyrirætlanir um það ( hleyp þó ekki jafn langt og Forrest...alllls ekki). 😅 Hann Guðjón Karl mágur minn skoraði svo á mig að taka þátt í maraþoninu í ár og hleypur hann einnig fyrir Krabbameinsfélagið.

Ég hleyp fyrir allt magnaða fólkið sem ég hef fengið að kynnast í gegnum árin og starfið mitt. Fólk sem hefur svo oft fyllt mig af auðmýkt og aðdáun og kennt mér að það að fá að lifa hinu hversdagslega lífi við góða heilsu er stór gjöf sem við ættum að þakka fyrir hvern dag.