Í minningu mömmu minnar, Særúnar Sigurgeirsdóttur, sem dó úr brjóstakrabbameini þann 12.mars 2022, þá hleyp ég í fyrsta skipti heilt maraþon. Í tilefni þess vil ég safna pening fyrir Brakkasamtökin. Samtökin styðja við og fræða fólk með BRCA stökkbreytingu sem gera líkur á brjóstakrabbameini yfirgnæfandi miklar, eða allt að 60-80% á lífsleiðinni. 

Mamma fékk fyrst brjóstakrabbamein þegar að ég var unglingur en sem betur fer greindist það snemma og hægt að lækna með skurðaðgerð og geislum. Í kjölfarið tókum við mamma, systir mín og ég þátt í rannsókn og gáfum sýni af okkar erfðaefni til að styðja við rannsóknir á brjóstakrabbameini. Á þessum tíma vissum við ekki af BRCA stökkbreytingunni. Eftir að hafa lesið viðtal við Kára, forstjóra Íslenskrar erfðagreiningar, árið 2018 þá fór ég á vefinn þeirra til að athuga hvort að ég væri BRCA arfberi. Það kom í ljós að ég var BRCA2 arfberi, svo að ég fékk mömmu og systir mína í tékk á Landspítalan. Systir mín slapp en þar kom í ljós að mamma var líka arfberi. Mamma og ég fórum svo í rannsóknir, ég var heilbrigð en því miður kom í ljós að mamma var komin með fjórða stigs krabbamein og við tók löng barátta við krabbameinið sem endaði um 3,5 árum seinna.