Síðasta sumar var ég nýbúin að halda heljarinnar “ræðu” um að ég hlaupi ekki nema einhver sé að elta mig og að hlaupa væri ógeðslega leiðinlegt og þannig réttlæti ég fyrir mér að slaka frekar á og njóta þess að skrolla í símanum. Á sama tíma var ég alltaf jafn hissa að vigtin fór ekkert niður á sama tíma og ég réttlæti fyrir sjálfri mér að ég þurfi ekkert að hreyfa mig. Þetta líf er flókið.

Í ágúst hitti ég svo á góða kunningjakonu sem var hætt að geta hlaupið sökum MS og ég, eins og asni, með ekkert nema afsakanir!

Ekki málið Edda, ég skal hlaupa fyrir þig sagði ég og tjóðraði á mig rándýra nýja hlaupaskó! Fyrsta hraðahindrun voru nýju skórnir sem var virkilega vont að hlaupa í, kom í ljós að um rándýra Padelskó var að ræða! Góð fjárfesting það!

Fann 15 ára gamla Reebok skærbleika skó (ónotaðir að sjálfsögðu) og þeir eru geggjaðir!

Playlistinn “Fannsa hleypur” er tilbúin á spotify svo nú spæni ég upp malbikið!

Ég ætla að hlaupa 10 km í ágúst fyrir hana Eddu Löve til styrktar MS-félaginu ❤️‍🔥

MS-félagið stendur vaktina fyrir fólk sem lifir með Multiple Sclerosis (MS) og skyldum sjúkdómum – á hverjum degi. Þeir veita ómetanlegan stuðning, ráðgjöf og fræðslu fyrir bæði einstaklinga og fjölskyldur sem standa frammi fyrir óvissu, áskorunum og breytingum sem fylgja langvinnum taugasjúkdómum. Félagið heldur utan um hópa, veitir sálfélagslega þjónustu, berst fyrir bættum réttindum og vinnur ötullega að því að bæta lífsgæði fólks.

Þetta er barátta sem fer fram í kyrrþey – en hefur djúpstæð áhrif á líf margra. Með því að styðja MS-félagið styður þú við bakið á fólki sem stendur í daglegri baráttu sem oft sést ekki utan frá. Þú hjálpar til við að tryggja að enginn þurfi að standa einn í sinni vegferð.

Ef þú hefur tök á, þá væri mér ómetanlegt að fá þinn stuðning – stóran sem smáan. Hvort sem þú vilt leggja inn framlag, hvetja mig áfram eða deila þessu með öðrum, þá skiptir hvert einasta skref máli.

Takk fyrir að standa með okkur Eddu – og með þeim sem þurfa á þessu frábæra starfi að halda.