Ég ætla að hlaupa fyrir hann elsku Mikka og væri ofsalega þakklát fyrir hverja krónu sem gæti hjálpað honum og fjölskyldu hans að halda áfram að skapa minningar og létta undir með þeim. Mikki á líka eina systur sem er með erfiða liðagigt og mig langar til að reyna að vera smá fyrirmynd með það að njóta þess sem maður getur hverju sinni og gefast aldrei upp. 

Ég, með mína liðagigt og mín veikindi undanfarin ár, ætla að grípa tækifærið núna og reyna að hlaupa þessa 10 km og láta gott af mér leiða í leiðinni. Ég hefði aldrei trúað að ég myndi geta hlaupið þessa vegalengd eftir allt sem á undan er gengið en nú ætla ég að slá til og njóta á meðan ég get. Það er ekkert víst að ég geti þetta á næsta ári eða í næsta mánuði, ef því er að skipta, en í næsta bakslagi get ég þá allavega farið til baka og munað þessa geggjuðu tilfinningu að geta hlaupið og nýtt það svo í uppbyggingu á ný. Miklar æfingar, fullt af bjartsýni, heill helvítis hellingur af þrjósku og smá mikilmennskubrjálæði hefur komið mér hingað.