Í ár hefur Minningarsjóður Hlyns Snæs ákveðið að styrkja söfnun Kolbrúnar Maríu Garðarsdóttur og fjölskyldu hennar í Reykjavíkurmaraþoni Íslandsbanka.

Kolbrún hefur verið samferðakona konunnar minnar í námi til félagsráðgjafar og á þessu ári hefur hún og fjölskylda hennar þurft að takast á við missi sem enginn ætti að þurfa að upplifa. Í febrúar lést móðir hennar, Sólveig Hulda, skyndilega og aðeins nokkrum mánuðum síðar kvaddi litla dóttir þeirra, Sólveig Hulda Egilsdóttir, aðeins degi eftir fæðingu.

Í tilefni af Reykjavíkurmaraþoninu hafa þau stofnað hlaupahóp til minningar um þær báðar og safna styrkjum fyrir Hollvinasamtök Sjúkrahússins á Akureyri, málstað sem var Sólveigu Huldu eldri afar kær.

Sem foreldrar sem höfum sjálf upplifað missi barns vitum við að engin orð geta tekið sársaukann burt. Við vitum hins vegar hversu miklu máli samstaða, hlýja og stuðningur geta skipt á erfiðum tímum.

Þess vegna höfum við ákveðið að Minningarsjóður Hlyns Snæs styðji söfnun þeirra í ár og hvetjum alla sem geta til að leggja málefninu lið og heiðra minningu tveggja einstakra Sólveiga.