Þetta árið ætla ég að hlaupa fyrir Sorgarmiðstöðina.

Eftir fráfall Þorláks okkar var það frábært fólk á vegum Sorgarmiðstöðvarinnar sem greip okkur fjölskylduna, ásamt mörgum öðrum sem Þorlákur Ingi hafði snert með nærveru sinni.

Fótboltafélagið Þorlákur FC ætlar að láta 15% af hverri seldri treyju renna beint til Sorgarmiðstöðvarinnar. Þeir hafa nýlega frumsýnt nýju treyjuna sína og hún er virkilega glæsileg.

Þetta félag er fyrst og fremst byggt á ást og umhyggju frá fjölmörgum vinum sem Þorlákur Ingi snerti með geislandi brosi sínu og einlægri vináttu. Þetta var draumur sem hann gekk lengi með, en því miður varð honum ekki aldur til að láta hann rætast.

Þegar ég frétti af þessari dásamlegu treyju sem Þorlákur FC var að láta gera var ekki spurning um annað en að hlaupa fyrir Sorgarmiðstöðina þetta árið og um leið styðja við þessi mikilvægu samtök sem taka utan um fólk þegar það stendur frammi fyrir mikilli sorg og missi.

Eins og vinir Þorláks sögðu vildu þeir gera eitthvað fyrir þessi samtök þar sem fjöldi vina hans fékk stuðning frá þeim. Síðustu ár hef ég hlaupið fyrir Pieta-samtökin, sem einnig standa okkur nærri, og því var erfitt að velja á milli þeirra í ár.

Ég hvet alla til að kaupa sér treyju hjá Þorláki FC. Með því styðjið þið ekki aðeins fallegt verkefni hjá strákunum,heldur einnig Sorgarmiðstöðina. Einnig getið þið heitið á mig í hlaupinu og stutt þannig enn frekar við þetta mikilvæga málefni🧡