Í ár ætla ég að hlaupa hálfmaraþon í Reykjavíkurmaraþoninu og um leið láta gott af mér leiða með því að safna fyrir Ljósið – Endurhæfingar- og stuðningsmiðstöð fyrir krabbameinsgreinda og aðstandendur þeirra.

Síðustu ár hafa reynt sérstaklega mikið á fjölskyldu okkar. Fyrir tæpum tveimur árum greindist móðir mín með lungnakrabbamein og lést af völdum hans tæpu hálfu ári síðar. Um ári eftir að hún greindist fékk bróðir minn, Jón Már, sömu greiningu. Hann lést 1. júní síðastliðinn eftir hetjulega baráttu. 

Með hlaupinu vil ég heiðra minningu þeirra og styðja við það mikilvæga starf sem Ljósið sinnir fyrir krabbameinsgreinda og fjölskyldur þeirra. Ljósið er sjálfstætt starfandi stofnun sem reiðir sig að stórum hluta á styrki til að halda úti starfsemi sinni.

Starfið sem þar er unnið skiptir öllu máli. Bæði Jón, mamma og pabbi nutu góðs af þeirri frábæru og óeigingjörnu þjónustu og stuðningi sem Ljósið veitir. Þess vegna er mér sérstaklega hjartfólgið að hlaupa fyrir Ljósið og leggja mitt af mörkum til þess að starfsemin geti áfram stutt við krabbameinsgreinda og aðstandendur þeirra.