Ég ætla að hlaupa í Reykavíkurmaraþoninu til minningar um elsku Evu okkar og safna um leið dýrmætum krónum fyrir Krabbameinsfélag Akureyrar og nágrennis.

Eva greindist með eittilfrumukrabbamein í desember 2019 og hóf strax mikla og erfiða meðferð. Hún mætti veikindunum af sama krafti og hún mætti öllu öðru í lífinu, með jákvæðni, húmor og ákveðni. Þrátt fyrir harða baráttu náði krabbameinið yfirhöndinni og Eva lést 15. ágúst 2020, aðeins 44 ára gömul.

Ég var svo heppin að sameiginlegur félagsskapur færði okkur Evu frænku á vinkonulevel sem batt okkur enn sterkari böndum. Eva er sannarlega ein af dýrmætu perlunum í vinafestinni minni.

Eva var hlý og einstaklega jákvæð. Eva var góð í að hlusta og til hennar var gott að leita. Hún var mesti pepparinn og besti skipuleggjandinn fyrir ferðirnar okkar saman. Hún væri eflaust búin að setja niður lista um hvað við ættum að hafa með okkur fyrir þessa "hlaupaferð" og veit ég að gleði og glimmer væri ofarlega á listanum.

Mér hefur ekki dottið það í hug fyrr að taka þátt í þessu hlaupi en þegar þessi hugmynd kom upp í tilefni af 50 ára afmælisdegi elsku Evu þá þurfti ég ekki að hugsa mig tvisvar um. Ég mæti með breitt bros og gleði í hjarta og þykist vita að sólargeislarnir muni skína á okkur þennan dag.

Takk fyrir allt Elsku Eva mín, Be Magical Be You 🩵