Ég ætla að hlunkast 10 km í Reykjavíkurmaraþoninu 🏃‍♀️

Hlaupaformið var því miður ekki sótt þetta sumarið. Það væri auðvitað ágætt að geta kennt ríkisstjórninni um það 😄 en ég verð víst að bera fulla ábyrgð á eigin leti!

Málstaðurinn sem ég hleyp fyrir er hins vegar bæði stór og hjartfólginn. Ég hleyp fyrir Þorláksskóla, skóla sem er að verða til vegna dugnaðar og eljusemi Vigdísar Hunnarsdóttur fyrir Jón sinn❤️

Þegar fjölskylda hans fór að leita að skóla fyrir hann varð ljóst að það vantaði eitthvað. Í stað þess að sætta sig við það ákvað hún að taka málin í eigin hendur og skapa skólann sjálf. Sú vegferð hefur orðið miklu stærri en nokkurn hefði getað órað fyrir.

Draumurinn er ekki aðeins að skapa Jóni skóla þar sem honum líður vel og fær að njóta sín, heldur að byggja upp skóla sem nýtist fjölda barna og fjölskyldna um ókomin ár.

Þorláksskóli verður nýr sérskóli fyrir einhverf börn sem byggir á TEACCH-hugmyndafræðinni og skynúrvinnslu- og áfallamiðaðri nálgun. Þar á hvert barn að fá öruggt, fyrirsjáanlegt og einstaklingsmiðað námsumhverfi og tækifæri til að blómstra á eigin forsendum.

Ef þið hafið tök á því væri mér innilega vænt um stuðning við hlaupið. Hvert framlag hjálpar til að færa þennan mikilvæga draum nær því að verða að veruleika.