Afhending gagna fyrir hlaupið fer fram í Laugardalshöll. Þar fá allir þátttakendur afhend þau gögn sem eru nauðsynleg og hægt er að kynna sér betur hlaupaleiðir og aðra þjónustu. Samhliða afhendingu gagna verður stórsýningin Fit&Run. Boðið verður upp á hlaupatengda fræðslu og íþróttavörur verða til sölu.
Opnunartímar
Opið er fimmtudag og föstudag fyrir hlaupdag en tímasetning verður birt hér þegar nær dregur hlaupi.
Mjög gott aðgengi er að húsinu og nóg af bílastæðum. Við Laugardalshöll eru 420 bílastæði og í næsta nágrenni þ.e. við Skautahöllina eru 220 stæði. Einnig eru 600 stæði við Laugardalsvöll sem er stutt frá auk þess sem margir strætisvagnar stoppa í nágrenninu.
Gengið er inn um inngang A í Laugardalshöll og fer afhending hlaupagagna fram í frjálsíþróttahúsinu.
Skráningargögn
Allir þátttakendur fá hlaupanúmer og nælur til að festa það framaná sig en tímatökuflagan er innbyggð í hlaupanúmerinu. Mjög mikilvægt er að brjóta ekki uppá númerið og passa þarf að hafa það vel sýnilegt að framan þegar farið er yfir tímatökumotturnar. Sjá nánar hér.
Þau sem ekki komast að sækja gögnin geta sent fulltrúa sinn á staðinn sem hefur upplýsingar um nafn og kennitölu - framvísa þarf kvittun.
Athugið að ekki er tekið á móti reiðufé, aðeins er hægt að borga í posa fyrir skráningar.
Fit and Run 2024
Um leið og þátttakendur sækja hlaupanúmerið sitt er tilvalið að taka stuttan hring á stórsýningunni FIT & RUN 2024 sem fer fram í höllinni á sama tíma. Sýningin er fyrir alla fjölskylduna þar sem áhersla er lögð á undirbúning hlaupara fyrir Reykjavíkurmaraþon Íslandsbanka, almenna hreyfingu, heilsufæði, fatnað, skóbúnað og aðrar stuðningsvörur hlauparans, ásamt skemmtilegum uppákomum. Á vef sýningarinnar má finna nánari upplýsingar um sýnendur o.fl.
