Frábær aðsókn var í Reykjavíkurmaraþon Íslandsbanka sem fór fram í dag. Það skiptist á skini og skúrum en aðallega skúrum en glaðir hlauparar létu ekki rigninguna á sig fá. Skráðir þátttakendur í dag voru rúmlega 16.000, þar af rúmlega 3.000 erlendir hlauparar frá yfir 90 mismunandi þjóðlöndum. Gríðarlega mikil stemning var í miðbænum og fögnuðu áhorfendur vel og mikið fyrir þreyttum hlaupurum sem komu í mark.
Leikar fóru þannig að í maraþoni kvenna sigraði Marion Tibar frá Eistlandi á tímanum 02:57:49. Hreint út sagt frábær árangur. Í öðru sæti var Annette Leistad frá Noregi og í þriðja sæti var Megan Rose Seibel frá Bandaríkjunum. Fljótasta íslenska konan í maraþoninu var Kristjana Pálsdóttir á tímanum 03:05:07.
Í maraþoni karla sigraði Austurríkismaðurinn Michael Bidmon á tímanum 02:21:36, í öðru sæti var Arnar Pétursson frá Íslandi og í þriðja sæti var Silviu Stoica frá Rúmeníu en hann vann hlaupið árið 2023.
Í hálfmaraþoni kvenna sigraði Elín Edda Sigurðardóttir á tímanum 01:23:38 en í öðru sæti var Hildur Aðalsteinsdóttir og í þriðja sæti var Rannveig Oddsdóttir.
Í hálfmaraþoni karla sigraði Liam Tilton á tímanum 01:07:50, í öðru sæti var Davíð Freyr Magnússon og í þriðja sæti var Atli Jasonarson.
Í 10 kílómetra hlaupi kvenna sigraði Íris Dóra Snorradóttir á tímanum 37:29, í öðru sæti var Katla Rut Róbertsdóttir Kluvers og í þriðja sæti var Sigþóra Brynja Kristjánsdóttir.
Í 10 kílómetra hlaupi karla sigraði Baldvin Þór Magnússon á tímanum 32:13, í öðru sæti var Viktor Orri Pétursson og í þriðja sæti var Youssef El Fahm frá Marokkó.
Það var einnig haldið skemmtiskokk, þar sem að hlauparar gátu hlaupið 1,4 km eða 3 km og hlupu ungir sem aldnir braut fulla af furðuverum, boðið var upp á froðudiskó, tónlistaratriði og var stemningin gríðarlega mikil.
Söfnunin á hlaupastyrkur.is er í fullu gangi og þegar þetta er skrifað hafa safnast yfir 291 milljónir króna sem er magnaður árangur og þetta þýðir það að heildarsöfnun á hlaupastyrkur.is er komin vel yfir 2 milljarða síðan að söfnunin hófst árið 2006. Ennþá er hægt að heita á góð málefni fram á miðnætti, mánudaginn 24. ágúst.
Íþróttabandalag Reykjavíkur þakkar þátttakendum, samstarfsaðilum, áhorfendum, starfsfólki, sjálfboðaliðum og öllum þeim sem tóku þátt í að skapa þennan frábæra viðburð.
