Uppskeruhátíð áheitasöfnunar Reykjavíkurmaraþons Íslandsbanka 2026 fór fram í gær. Aðalstyrktaraðili hlaupsins, Íslandsbanki, bauð til hátíðarinnar í höfuðstöðvum sínum í Norðurturni. Á uppskeruhátíðinni komu saman fulltrúar góðgerðafélaga, hlauparar, starfsmenn og stuðningsaðilar til að fagna góðum árangri áheitasöfnunar Reykjavíkurmaraþons Íslandsbanka sem fram fór á vefnum hlaupastyrkur.is.
Í ár söfnuðu hlauparar 307.885.945 krónum. Heildarupphæð áheita sem hafa safnast í tengslum við Reykjavíkurmaraþon Íslandsbanka frá því áheitasöfnun hófst árið 2006 er nú komin í um 2,5 milljarða. Þeir hlauparar sem söfnuðu mest fengu viðurkenningu á áheitahátíðinni í gær.
Eiður Rafn Gunnarsson safnaði mest allra einstaklinga, 5.300.000 fyrir Píeta Samtökin. Sigurbjörg Ýr Guðmundsdóttir safnaði næst mest, 3.775.000 krónur fyrir Styrktarfélag Magnúsar Mána. Guðjón Norðfjörð safnaði þriðja mest, 2.835.745 krónum fyrir ABC Barnahjálp.
Sá hlaupahópur sem safnaði mestu var Til minningar um Sólveigu Huldu en þau söfnuðu 7.670.000 krónur fyrir Hollvinasamtök SAk. Sá hlaupahópur sem safnaði næst mest var Karfarnir en þau söfnuðu 1.771.000 krónur fyrir Ljósið , og sá hópur sem safnaði þriðja mest var Team Albert eða 1.486.000 fyrir Ljósið.
Yfir 170 góðgerðarfélög söfnuðu áheitum í ár, en áheitin hafa verið greidd til góðgerðafélaganna. Öll áheit sem bárust fara beint til félaganna því Íslandsbanki greiðir allan kostnað við söfnunina. Þau félög sem fengu mestu í ár eru Ljósið - Endurhæfingar- og stuðningsmiðstöð fyrir krabbameinsgreinda safnaði mest allra góðgerðafélaga eða 38.077.599 krónur, Börn með krabbamein söfnuðu 19.935.882 krónur og Píeta Samtökin, söfnuðu 16.025.412 krónur.
Við þökkum þeim fjölmörgu góðgerðarfélögum, hlaupurum sem hlupu fyrir gott málefni og að sjálfsögðu þeim sem styrktu kærlega fyrir ykkar þátttöku í ár.
