Björgunarsveitin Kyndill hefur starfað síðan árið 1960 við leit og björgun ásamt forvarnarstarfi. Sveitin sinnir einnig óveðursaðstoð, verðmætabjörgun og ýmsum verkefnum sem til falla samfélaginu öllu til heilla.  Allt starf sveitarinnar er að sjálfsögðu unnið í sjálfboðavinnu en öll innkoma er nýtt til reksturs þeirra tækja sem til eru, viðhald húsnæðis og til að kaupa hverskyns björgunarbúnað. Núna er verið að fjárfesta í nýjum Buggy bíl sem a eftir að koma ser vel þegar fara þarf yfir erfið svæði svosem sandbleytur og aðrar erfiðar aðstæður þar sem erfitt er nota fullvaxna torfærujeppa. Við þurfum líka að breyta Nissan Patrol jeppanum okkar til að tryggja að hann sé til reiðu þegar kallið kemur. Þá er ætlunin að skipta um járn og glugga í veggjunum á húsi Kyndils. Þetta eru þrjú stærstu verkefnin sem okkur langar að fara í á árinu ef fjárhagurinn leyfir. Að halda úti öflugu björgunarstarfi  og passa að öll tæki séu í lagi þegar á þarf að halda er vissulega áskorun en vel launuð þegar upp er staðið. Að koma slösuðum einstakling ofan af hálendinu eða jöklum landsins í hendurnar á sjúkraflutningafólki í ekki verra ástandi heldur en þegar við komum að er það sem við meðlimir brennum fyrir. Þegar þetta tekst erum við meðlimir Kyndils þiggjendur. Og við erum alla daga ársins tilbúin að taka við slíkum gjöfum.

Björn Helgi Snorrason 

Formaður Kyndils