Í sumar verður boðið upp á skemmtilega nýjung fyrir alla sem vilja njóta útivistar og hreyfingar á sínum eigin hraða.
Frá og með 6. ágúst verður opnuð um 32,2 km merkt gönguleið í Heiðmörk þar sem markmiðið er einfalt: að ganga leiðina á þeim tíma sem hentar hverjum og einum fram að Íslandsbanki Reykjavíkurmaraþoni.
Leiðin er ætluð öllum. Hver og einn velur sinn eigin hraða, skiptir göngunni niður í eins marga áfanga og hentar og nýtur um leið fjölbreyttrar náttúru Heiðmerkur.
Þegar leiðinni í Heiðmörk er lokið er næsta skref að taka þátt í Skemmtigöngunni á maraþonsdeginum og ganga síðustu 10 km. Við það hefur þátttakandi lokið 42,2 km eða heilu maraþoni, á sínum eigin forsendum. Í endamarkinu tekur við sama hátíðarstemning og maraþonhlauparar upplifa þegar þeir ljúka sínu hlaupi.
Klukkaðu stólpana
Á gönguleiðinni er hægt að safna stigum með því að klukka stólpana í appinu. Fyrir fyrstu heimsókn að hverjum stólpa fást full stig en við endurteknar heimsóknir fást hálf stig. Þannig er auðvelt að fylgjast með framförum og safna stigum á leiðinni.
Þetta er ekki ratleikur þar sem leita þarf að földum merkjum í holum og gjótum. Stólparnir eru hluti af leiðinni og tilgangurinn er að hvetja fólk til að uppgötva fjölbreyttar og fallegar gönguleiðir í Heiðmörk.
Tilraunaverkefni í Heiðmörk
Verkefnið er tilraunaverkefni í þróun í Heiðmörk. Samtals verða merktar um 33 km af gönguleiðum sem verða formlega opnaðar 6. ágúst.
Markmiðið er að hvetja sem flesta til útivistar, hreyfingar og þess að upplifa þá einstöku tilfinningu að fara yfir endamarkslínu eftir að hafa lokið heilu maraþoni, skref fyrir skref og á eigin forsendum.
Gakktu í Heiðmörk. Klukkaðu alla stólpana. Mættu svo í Skemmtigönguna. Ljúktu heilu maraþoni – á þínum eigin forsendum.
Hægt er að kynna sér þetta skemmtilega verkefni frekar hér.
