Reykjavíkurmaraþon Íslandsbanka 2026 fer fram laugardaginn 22. ágúst. Í ár verða nýjar hlaupaleiðir og verða því bæði rásmark og endamark á nýjum stöðum.
Ræst við Háskóla Íslands og endað við Kolaportið
Eins og undanfarin ár verður boðið upp á fjölbreyttar vegalengdir og ættu því allir að geta fundið hlaup við sitt hæfi. Um er að ræða maraþon, hálfmaraþon, 10 km og skemmtiskokk sem er annaðhvort 3 km eða 1,7 km.
Að þessu sinni verður ræst í öllum vegalengdum frá Sæmundargötu fyrir framan Háskóla Íslands og hlaupið verður í mark á Geirsgötu við Kolaportið. Frá rásmarki færast hlaupaleiðirnar fljótt inn á hlaupaleiðir síðustu ára. Þá hafa einnig verið gerðar breytingar á öllum hlaupaleiðum frá Granda. Breyttar hlaupaleiðir má finna á vef Reykjavíkurmaraþons Íslandsbanka hér.
Breytingarnar á hlaupaleiðunum eru gerðar með það fyrir augum að auka aðgengi, yfirsýn og öryggi, bæði fyrir hlaupara og áhorfendur. Fjöldi þátttakenda og áhorfenda hefur farið vaxandi síðustu ár og því ljóst að aðstæður við bæði rásmark og endamark voru orðnar of þröngar. Með breytingunum skapast meira svigrúm svo maraþonið fái að vaxa enn frekar á næstu árum. Þá munu þær einnig draga úr áhrifum hlaupsins á umferð um Hringbraut.
Þátttakendur og stuðningsfólk farið að reima skóna
Það stefnir í góða þátttöku í hlaupinu í ár en nú þegar hafa um 5000 skráð sig til leiks og skráning fer mjög vel af stað. Reykjavíkurmaraþon Íslandsbanka hefur fest sig í sessi sem einn stærsti hlaupaviðburður ársins og ekki má gleyma öllum þeim góðu málefnum sem þátttakendur hlaupa til styrktar. Í fyrra söfnuðust rúmlega 326 milljónir króna og alls hafa safnast yfir 2 milljarðar króna frá því að áheitasöfnun hófst árið 2006.
„Við erum orðin mjög spennt fyrir hlaupinu í ár,“ segir Hrefna Hlín Sveinbjörnsdóttir sviðstjóri hjá ÍBR. „Við teljum að þessar breytingar á hlaupaleiðinni muni skapa gott rými til að halda áfram að styðja við stöðugan vöxt og þróun Reykjavíkurmaraþons Íslandsbanka. Maraþonið er orðið fastur liður, jafnt fyrir þátttakendur sem og stuðningsfólk sem flykkist út á götur að hvetja. Við eigum von á því að það verði ekkert öðruvísi í ár.“
Mikil stemning hefur myndast í kringum hlaupið þegar kemur að því að hvetja og styðja við þátttakendur og er löngu orðið ljóst að stuðningsfólk gegnir lykilhlutverki í framgangi hlaupsins. Í ár verður lögð sérstök áhersla á stuðningsfólk, góðgerðarfélögin og hverfin sem leggja allt undir þegar kemur að því að hvetja þátttakendur áfram.
