Hlaupum til minningar og stuðnings: Styðjum Hjaltastaði** Hjaltastaðir er þróunarverkefni sem spratt upp úr neyðarkalli – miklum skorti á úrræðum fyrir ungt fólk sem hefur ekki fundið sína hillu í íslensku samfélagi. Allt of mörg ungmenni upplifa sig einangruð og úti á jaðrinum. Sem samfélag verðum við að bregðast við áður en það verður of seint. Verkefnið heitir í höfuðið á Hjalta Snæ og er þróað til minningar um hann og fleiri sem gefist hafa upp, en ekki síður fyrir þau sem standa í ströngustu baráttunni í dag. Markmið okkar er að búa til stað þar sem öll fá að tilheyra, finna tilgang og upplifa að þau skipti máli. Við horfum framhjá greiningum og einblínum á styrkleika hvers og eins, og mætum fólki nákvæmlega þar sem það er statt. Starfsemi Hjaltastaða mun byggja á nálægð við náttúru og dýr, þar sem samkennd, samheldni og sjálfbærni (m.a. með ræktun og samstarfi við bændur) eru í fyrirrúmi. Stuðningur þinn í Reykjavíkurmaraþoninu gerir okkur kleift að byggja upp þetta mikilvæga athvarf og skapa samfélag þar sem enginn þarf að vera púslið sem passar ekki. Takk fyrir stuðninginn!