Hjaltastaðir – Frá sorg til sögu um von, tilgang og tilheyrslu Hjaltastaðir er þróunarverkefni á sviði geðheilbrigðis- og stuðningsmála sem spratt upp úr sárri reynslu og miklu neyðarkalli í íslensku samfélagi. Verkefnið er stofnað í minningu Hjalta Snæs, sem tók sitt eigið líf í mars 2025, aðeins 23 ára að aldri. Hjalti var á einhverfurófi og glímdi við geðrof síðustu tvö æviárin sín. Síðustu vikurnar í lífi hans voru fullar af von – hann sýndi ótrúlegan vilja til að komast aftur út í lífið, finna sér hlutverk og tilheyra samfélaginu. En á ögurstundu brást kerfið honum; þegar hann kallaði skýrt eftir hjálp á endurhæfingarstöðinni þar sem hann bjó, var ekki hlustað. Saga Hjalta Snæs er því miður ekki einstök. Allt of mörg ungmenni upplifa sig í dag eins og púslið sem passar hvergi inn. Þau falla á milli kerfa, mæta lokuðum dyrum eða stimplum sem skilgreina þau út frá greiningum frekar en styrkleikum. Við verðum að bregðast við áður en það verður of seint – við höfum misst of marga í blóma lífsins. 

Framtíðarsýn Hjaltastaða: Hvað ætlum við að gera? Með Hjaltastöðum viljum við byggja upp öruggt og nærandi samfélag þar sem ungt fólk fær tækifæri til að blómstra á eigin forsendum. Hugmyndafræðin byggir á því að horfa framhjá greiningum og einblína þess í stað á manneskjuna og styrkleika hennar. 

 Samfélag á jafningjagrundvelli: Staður þar sem ríkir samkennd, samvinna, samvera, samhugur og samheldni.  

Tenging við náttúru og dýr: Starfsemin mun leggja ríka áherslu á dýrahald og náttúru sem órúfgan hluta af endurhæfingu, vellíðan og seiglu.  

Sjálfbærni í framkvæmd: Lögð verður áhersla á sjálfbærni, m.a. með ræktun frá grunni og samstarfi við bændur og aðra hagaðila á svæðinu, sem gefur ungmennunum raunveruleg og dýrmæt hlutverk.  

Að mæta fólki þar sem það er statt: Engir stimplar, engar kröfur um að passa í fyrirfram ákveðin box – heldur stuðningur sem mætir þörfum hvers og eins á þeirra forsendum. Í hvað fara áheitin þín? Öll áheit sem safnast í Reykjavíkurmaraþoninu renna beint í uppbyggingu og þróun á þessu mikilvæga úrræði. Stuðningur þinn gerir okkur kleift að leggja grunninn að lífsnauðsynlegu athvarfi sem grípur unga fólkið okkar þegar það vantar tilgang og tengingu. Með því að heita á hlaupara Hjaltastaða hjálpar þú okkur að halda minningu Hjalta Snæs og fleiri ungmenna lifandi með því að skapa betra, mennskara og opnara samfélag. 

Hlaupum saman fyrir samfélag þar sem öll fá að tilheyra!