Í ár ætlar Hvolpasveitin að hlaupa til minningar um elsku hetjuna okkar, Söndru Þorsteinsdóttur, sem lést eftir erfið veikindi þann 20. febrúar sl.

Þann 17. febrúar 1988 greindist Sandra með bráðahvítblæði (AML), þá aðeins 8 ára gömul. Í kjölfar greiningar var hún sett í mjög erfiða lyfja- og geislameðferð sem tók sinn toll. Mánuðum saman var henni vart hugað líf svo mikil voru átökin. Sandra barðist eins og ljón fyrir lífi sínu og kom þá berlega í ljós hvað hún bjó yfir miklum styrk og baráttuvilja. Algjör viðsnúningur varð í veikindum Söndru þegar í ljós kom að móðir hennar, Katrín Guðjónsdóttir, og allar systur hennar á þeim tíma, Sólveig, Halla og Stella Maris, gátu gefið henni merg. Sumarið 1988 fóru fram mergskipti á Huddinge sjukhus í Stokkhólmi og var ákveðið að Stella Maris yrði merggjafinn. Sú gjöf reyndist lífsbjörg Söndru og útskrifaðist hún aftur heim á Landspítalann í október 1988 þar sem hún náði smátt og smátt að læknast af hvítblæðinu. Næstu 5 árin var Sandra í eftirliti hjá læknunum Guðmundi og Jóni og fylgdu þeir henni vel eftir. Þó Sandra hafi læknast af hvítblæðinu þá glímdu hún alla tíð við miklar síðbúnar afleiðingar. Það var mikið átak fyrir hana að fara út i lífið aftur og lítill stuðningur á þeim árum gagnvart þessum hópi og fjölskyldum þeirra. Styrktarfélag krabbameinssjúkra barna (SKB) var stofnað árið 1991 af foreldrum barna sem höfðu greinst með krabbamein. Faðir Söndru, Þorsteinn Ólafsson, kom að stofnun félagsins og varð síðar framkvæmdastjóri þess. Því starfi gegndi hann í 10 ár með góðum árangri.

Sandra glímdi alla tíð við miklar síðbúnar afleiðingar eftir krabbameinsmeðferðina og þurfti oft að leggjast inn á sjúkrahús vegna þessa. Hún barðist ávallt eins og ljón og mjög hetjulega við öll þau veikindi sem á hana dundu. En svo kemur að þeim tímapunkti að það er ekki lengur stætt og maður þarf að játa sig sigraðan. Sandra lauk lífsgöngu sinni í faðmi ástvina og undir söng Bette Midler, Wind beneath my wings, innan við mánuði eftir að hún hélt upp á 45 ára afmælið sitt.

Sandra okkar er mesta hetja sem við þekkjum og til að heiðra minningu hennar og þann mikla lífskraft sem í henni bjó ætlum við, fjölskylda Söndru (Hvolpasveitin), að hlaupa í Reykjavíkur maraþoninu til styrktar SKB. Félagið hefur alla tíð reynst Söndru og hennar fjölskyldu gríðarlega vel og allt til endaloka. Sá stuðningur var henni og fjölskyldunni ómetanlegur og jók lífsgæði hennar. Með hlaupinu erum við að heiðra minningu okkar elskuðu Söndru ásamt því að styrkja önnur börn og fjölskyldur þeirra sem þurfa að glíma við þennan illvíga sjúkdóm.

Við munum hlaupa með lífsbaráttukraftinn hennar Söndru í hjartanu um leið og við söfnum áheitum fyrir gott málefni sem er okkur afar kært. Okkur þætti óendanlega vænt um ykkar stuðning og vonum að þið heitið á okkur sem verður svo sannarlega mikil hvatning.

Takk fyrir stuðninginn ❤️