Hlaupahópur
Mæðgur hlaupa fyrir Ljósið
Hleypur fyrir Ljósið - Endurhæfingar- og stuðningsmiðstöð fyrir krabbameinsgreinda
Samtals Safnað
Markmið
Margt smátt
Þegar ég mætti í Ljósið í fyrsta sinn var ég ekki sannfærð um að það væri staður fyrir mig. Ég gerði ráð fyrir að það væri staður fyrir veikt fólk og vandamál en ég var með önnur plön um að byggja mig upp – sjálf! Annað kom fljótlega á daginn.
Á þessum tíma var ég að jafna mig eftir stóra aðgerð og áfallið sem fylgdi því að greinast með krabbamein. Ég hafði litla matarlyst og lifði á próteindrykkjum, helstu afrekin voru göngutúrar í hægum takti og ekki eins langir og ég vildi, hausinn spilaði aftur og aftur sama lagið “hvað ef…”, sjálfstraustið var ekki upp á marga fiska og ég vildi helst ekki hitta neinn þar sem ég vissi aldrei hvenær ég færi að grenja. Verst af öllu fannst mér að þurfa að vera upp á aðra komin og það sem hræddi mig allra mest var að verða “sjúklingur”.
Ég hef aldrei hitt neina sjúklinga í Ljósinu. Þvert á móti. Þar hef ég kynnst áhugaverðu og skemmtilegu fólki sem er að fást við allskyns spennandi verkefni. Vissulega eru margir að glíma við mjög erfiða hluti og fá þar góðan stuðning frá fagfólki og öðrum sem eru að ganga í gegnum sambærilega reynslu. Galdurinn við Ljósið er að þar er tekið á móti þér eins og heilbrigðri manneskju, horft til þess hver þú ert og byggt á þeim styrkleikum sem þú hefur. Þér er boðið upp á ótal tækifæri til þess að prófa nýja hluti, vaxa og blómstra jafnvel á nýjum sviðum. Eina vandamálið við Ljósið er að þar vill helst enginn hætta.
Í ágúst lýkur endurhæfingu hjá mér í Ljósinu og mig langar kveðja og þakka fyrir mig með því að taka þátt í Reykjavíkurmaraþoni. Svo ótal margt að þakka fyrir; ræktina, leirinn, fræðsluna, markþjálfatímana, grænmetismatinn en ekki síst stuðninginn, hvatninguna, gleðina, hlýjuna og vináttuna. Allt þetta litla sem er samt svo risastórt.
Mér þætti ofurvænt um að fá stuðning sem flestra við að gefa til baka og styðja við starfið í Ljósinu. Framlagið þarf alls ekki að vera stórt í krónum talið – margt smátt gerir eitt stórt <3
Við mæðgur ætlum að reima á okkur hlaupaskóna til styrktar Ljósinu. Við værum þakklátar fyrir ykkar stuðning <3
Markmiðið er að safna 76.000 kr. sem er samanlagður aldur okkar í þúsundum talið.
Ljósið - Endurhæfingar- og stuðningsmiðstöð fyrir krabbameinsgreinda
Ljósið er sjálfstætt starfandi endurhæfingar- og stuðningsmiðstöð fyrir krabbameinsgreinda. Hjá okkur starfar þverfaglegur hópur fagaðila að andlegri, líkamlegri og félagslegri endurhæfingu þeirra sem greinast með krabbamein allt frá 16 ára aldri. Einnig veitum við þeim sem greinast og aðstandendum allt niður í 6 ára aldur fræðslu og stuðning.
Hlauparar í hópnum
Nýir styrkir